थप २५ जनामा कोरोना संक्रमण, १५ जना संक्रमणमुक्त, ९७ सक्रिय संक्रमित

१ असार, काठमाडौं । नेपालमा पछिल्लो २४ घण्टाभित्र २५ जनालाई कोरोना भाइरसको संक्रमण पुष्टि भएको छ । त्यस्तै १५ जना भने निको भएको स्वास्थ्य मन्त्रालयले जनाएको छ ।

मन्त्रालयका अनुसार गत २४ घण्टामा २ हजार ८५६ आरटी पीसीआर विधि र १ हजार ४९ एन्टिजेन गरी जम्मा ३ हजार ९०५ नमुना परीक्षण गरिएकोमा २५ नमुनाको नतिजा पोजिटिभ आएको छ ।

नेपालमा हालसम्म कोरोना संक्रमण केस आरटी पीसीआर विधीबाट ९ लाख ७९ हजार २९७ र एन्टिजेन विधीबाट १ लाख ४० हजार ३५५ पुगेको छ । संक्रमितमध्ये ९ लाख ६७ हजार २४८ केस संक्रमणमुक्त भएको छ । अब देशभर ९७ जना सक्रिय संक्रमित छन् ।

नेपालमा हालसम्म कोरोनाका कारण ११ हजार ९५२ जनाले ज्यान गुमाएका छन् । संक्रमितमध्ये ९८.८ प्रतिशत निको भएका छन् भने १.२ प्रतिशतको मृत्यु भएको छ ।