शुक्रबार एकैदिन थपिए ७४० कोरोना संक्रमित, एकको मृत्यु, संक्रमित संख्या १५ हजार २५९ पुग्यो

१९ असार, काठमाडौं । नेपालमा शुक्रबार थप ७४० जनामा कोरोना भाइरसको संक्रमण देखिएको छ । स्वास्थ्य मन्त्रालयका प्रवक्ता प्रा.डा.जागेश्वर गौतमका अनुसार पछिल्लो २४ घण्टामा ७४० जनामा कोरोना भाइरसको संक्रमण देखिएको छ ।

योसँगै नेपालभर कोरोना संक्रमितको संख्या १५ हजार २५९ पुगेको छ ।

एकको मृत्यु
काठमाडौँ नयाँ बानेश्वरका ८५ बर्षीय वृद्धको कोभिड–१९ का कारण मृत्यु भएको पुष्टि भएको छ । उनलाई उच्च रक्तचाप र पार्किन्ससको समस्या रहेको मन्त्रालयले जनाएको छ । छाती दुख्ने लगायतका समस्या भएपछि काठमाडौँको एक निजि अस्पतालमा भर्ना भएका उनको १७ गते राती ११ बजे मृत्यु भएकोमा मृत्यु पश्चात कोरोना पुष्टि भएको हो ।

८२३ जना निको भए
पछिल्लो २४ घण्टामा ८२३ जना संक्रमित उपचारपछि डिस्चार्ज भएको प्रवक्ता डा.गौतमले जानकारी दिए । संक्रमितमध्ये अहिलेसम्म ६ हजार १४३ जना निको भएर घर फर्किइसकेका छन् ।