Get real time updates directly on you device, subscribe now.
१७ असोज, काठमाडौँ । नेपालमा शनिबार ८ जना कोरोना संक्रमितको मृत्यु भएको छ । पछिल्लो २४ घण्टामा २ जना महिला र ६ जना पुरुषको मृत्यु भएको स्वास्थ्य मन्त्रालयले जानकारी दिएको छ ।
स्वास्थ्य मन्त्रालयका अनुसार कोरोना संक्रमणका कारण ललितपुरमा ६७ वर्षीय पुरुष, काठमाडौँमा ६८ र ८३ वर्षीय पुरुष, सिन्धुपाल्चोकमा ४१ वर्षीय पुरुष, दोलखामा ६५ वर्षीय पुरुष र कैलालीमा ७९ वर्षीय पुरुषको मृत्यु भएको छ ।
त्यस्तै सुनसरीमा २८ वर्षीय महिला र चितवनमा ७६ वर्षीय महिलाको कोभिड–१९ बाट मृत्यु भएको छ ।
योसँगै नेपालमा कोरोना संक्रमणका कारण मृत्यु हुनेको संख्या ५२८ पुगेको छ । संक्रमितमध्ये ०.६२ प्रतिशतको मृत्यु भएको स्वास्थ्य मन्त्रालयले जनाएको छ ।
पछिल्लो २४ घण्टामा देशभरी २ हजार १ सय २० जनामा कोरोना भाइरसको संक्रमण देखिएको छ । त्यस्तै २ हजार ४४ जना संक्रमित निको भएका छन् ।