Get real time updates directly on you device, subscribe now.
२५ असार, काठमाडौँ । सरकारले भोली देखि लागु हुने गरी सम्बन्धित जिल्लाभित्र सार्वजनिक यातायात सञ्चालन गर्न दिने भएको छ । काठमाडौँ उपत्यकाभित्र भने तीन ओटै जिल्लामा आवतजावत गर्न पाइनेछ ।
सरकारको निर्णय सार्वजनिक गर्दै सरकारका प्रवक्ता एवं सञ्चार तथा प्रविधि मन्त्री डा.युवराज खतिवडाले मापदण्ड पुरा गरी सार्वजनिक यात्रुबाहक सवारी सञ्चालन गर्न खुला गरिएको जानकारी दिएका छन् ।
काठमाडौँ उपत्यकाको हकमा काठमाडौँ उपत्यकाभित्र र अन्य जिल्लाको हकमा जिल्लाभित्र मात्रै सार्वजनिक यात्रुबाहक सवारी सञ्चालन गर्न सकिनेछ । लामो दुरी तथा अन्तर जिल्लामा भने सवारी सञ्चालन गर्न पाइने छैन ।
त्यस्तै जोर/बिजोर प्रणाली अनुरुप निजि सवारी र मोटरसाइकललाई पनि सञ्चालन सुचारु गर्न दिने सरकारको निर्णय छ । सरकारले हाल निजि सवारी र मोटरसाइकललाई मात्रै जोर÷बिजोर प्रणालीमा सवारी सञ्चालन गर्न दिइरहेको छ ।
निजि सवारीमा चालक सहित थप दुई जना र एकै परिवारका भए पाँच बर्षसम्मका बालबालिका राख्न अनुमति दिइएको छ । र सम्बन्धित जिल्ला भित्र ट्याक्सीलाई पनि चालक र थप दुई जना यात्रा गर्न दिइनेछ ।
सार्वजनिक सवारी साधनले चालकबाहेक सिट क्षमताको बढीमा ५० प्रतिशत यात्रुमात्र राख्नुपर्नेछ भने सामाजिक दुरी कायम हुने गरी एक पक्तिंको एक सिटमा १ जना मात्रै राख्नुपर्नेछ ।
सवारी साधनमा यात्रु चढ्ने समयमा सवारीसाधनको ढोकामा सवारी साधनभित्र स्यानिटाइजरको व्यवस्था गर्नुपर्नेछ भने चालक तथा सहचालकले अनिवार्य रुपमा मास्क, भाइजर तथा पञ्जाको प्रयोग गर्नुपर्नेछ ।
त्यस्तै सबै यात्रुहरुले अनिवार्य मास्क लगाउनुपर्नेछ । सवारी साधनलाई दैनिक रुपमा निसंक्रमित गर्नेगरी सञ्चालन गर्नुपर्नेछ भने मापदण्ड पुरा गरी सवारी चलाउँदा तोकिएको भाडा दरमा ५० प्रतिशत सम्म बढी भाडा लिन सकिने सरकारले निर्णय गरेको छ ।