कर्णाली प्रदेशको दैलेख सहित १८ जनामा कोरोना संक्रमण, संक्रमित संख्या ३७५ पुग्यो

५ जेठ, काठमाडौं । नेपालमा सोमबार राति पुनः १८ जनामा कोरोना भाइरसको संक्रमण पुष्टि भएको छ । धनुषा जिल्लाका २, खोटाङका १, बाँकेका १२, दैलेखका १, सुनसरीका १ र झापाका १ जनामा कोरोना संक्रमण पुष्टि भएको स्वास्थ्य मन्त्रालयले जनाएको छ ।

काठमाडौंको टेकुस्थित राष्ट्रिय जनस्वास्थ्य प्रयोगशाला, धरानस्थित विपी कोइराला स्वास्थ्य विज्ञान प्रतिस्ठान, भेरी अस्पताल धरान र कोशी अस्पताल विराटनगरको प्रयोगशालामा गरिएको थ्रोट स्वाब परीक्षणबाट उनीहरु १८ जनामा कोरोना संक्रमण पुष्टि भएको हो ।

थपिएका नयाँ संक्रमितहरुमा धनुषा जिल्ला निवासी २ जना पुरुषहरु, खोटाङ जिल्ला हलेसी निवासी १ जना पुरुष, बाँके जिल्ला नरैनापुर निवासी १२ जना पुरुषहरु, दैलेख, आठबिस–१ निवासी १ जना पुरुष, सुनसरी निवासी १ जना पुरुष र झापा निवासी १ जना पुरुष रहेका छन् ।

दैलेखमा १ जनामा कोरोना पुष्टि भएसँगै कर्णाली प्रदेशमै पहिलो पटक कोरोना संक्रमित देखिएको छ । यसअघि सात प्रदेश मध्ये कर्णाली प्रदेशमा मात्र कोरोना संक्रमण फैलिएको थिएन ।

त्यस्तै खोटाङमा पनि आज पहिलो पटक कोरोना संक्रमित देखिएको छ । खोटाङका संक्रमित युवक काठमाडौंबाट खोटाङ गएको खुलेको छ । काडमाडौंमा उनी सहकारीको पैसा संकलन गर्ने काम गर्दथे ।

संक्रमितहरु सबै जना अहिले स्वास्थ्यकर्मीको सम्पर्कमा रहेको र स्वास्थ्य अवस्था सामान्य रहेको स्वास्थ्य मन्त्रालयका सह–प्रवक्ता डा.समिर कुमार अधिकारीले जानकारी दिएका छन् ।

यससँगै नेपालभर कोरोना संक्रमितहरुको संख्या ३७५ पुगेको छ । २ जना संक्रमितको मृत्यु भएको छ । संक्रमितहरुमध्ये ३६ जना निको भएका छन् । अन्य संक्रमितहरु सबै उपचाररत रहेका छन् । उपचाररत सबैको स्वास्थ्य स्थिति सामान्य रहेको स्वास्थ्य मन्त्रालयले जनाएको छ ।